Isaiah 9
Study Bible
Unto Us a Child is Born

כִּ֣י  לֹ֣א  מוּעָף֮  לַאֲשֶׁ֣ר  מוּצָ֣ק  לָהּ֒  כָּעֵ֣ת  הָרִאשׁ֗וֹן  הֵקַ֞ל  אַ֤רְצָה  זְבֻלוּן֙  וְאַ֣רְצָה  נַפְתָּלִ֔י  וְהָאַחֲר֖וֹן  הִכְבִּ֑יד  דֶּ֤רֶךְ  הַיָּם֙  עֵ֣בֶר  הַיַּרְדֵּ֔ן  גְּלִ֖יל  הַגּוֹיִֽם׃ 

הָעָם֙  הַהֹלְכִ֣ים  בַּחֹ֔שֶׁךְ  רָא֖וּ  א֣וֹר  גָּד֑וֹל  יֹשְׁבֵי֙  בְּאֶ֣רֶץ  צַלְמָ֔וֶת  א֖וֹר  נָגַ֥הּ  עֲלֵיהֶֽם׃ 

הִרְבִּ֣יתָ  הַגּ֔וֹי  [לֹא  כ]  (לֹ֖ו  ק)  הִגְדַּ֣לְתָּ  הַשִּׂמְחָ֑ה  שָׂמְח֤וּ  לְפָנֶ֙יךָ֙  כְּשִׂמְחַ֣ת  בַּקָּצִ֔יר  כַּאֲשֶׁ֥ר  יָגִ֖ילוּ  בְּחַלְּקָ֥ם  שָׁלָֽל׃ 

כִּ֣י ׀  אֶת־  עֹ֣ל  סֻבֳּל֗וֹ  וְאֵת֙  מַטֵּ֣ה  שִׁכְמ֔וֹ  שֵׁ֖בֶט  הַנֹּגֵ֣שׂ  בּ֑וֹ  הַחִתֹּ֖תָ  כְּי֥וֹם  מִדְיָֽן׃ 

כִּ֤י  כָל־  סְאוֹן֙  סֹאֵ֣ן  בְּרַ֔עַשׁ  וְשִׂמְלָ֖ה  מְגוֹלָלָ֣ה  בְדָמִ֑ים  וְהָיְתָ֥ה  לִשְׂרֵפָ֖ה  מַאֲכֹ֥לֶת  אֵֽשׁ׃ 

כִּי־  יֶ֣לֶד  יֻלַּד־  לָ֗נוּ  בֵּ֚ן  נִתַּן־  לָ֔נוּ  וַתְּהִ֥י  הַמִּשְׂרָ֖ה  עַל־  שִׁכְמ֑וֹ  וַיִּקְרָ֨א  שְׁמ֜וֹ  פֶּ֠לֶא  יוֹעֵץ֙  אֵ֣ל  גִּבּ֔וֹר  אֲבִיעַ֖ד  שַׂר־  שָׁלֽוֹם׃ 

[לְמַרְבֵּה  כ]  (לְמַרְבֵּ֨ה  ק)  הַמִּשְׂרָ֜ה  וּלְשָׁל֣וֹם  אֵֽין־  קֵ֗ץ  עַל־  כִּסֵּ֤א  דָוִד֙  וְעַל־  מַמְלַכְתּ֔וֹ  לְהָכִ֤ין  אֹתָהּ֙  וּֽלְסַעֲדָ֔הּ  בְּמִשְׁפָּ֖ט  וּבִצְדָקָ֑ה  מֵעַתָּה֙  וְעַד־  עוֹלָ֔ם  קִנְאַ֛ת  יְהוָ֥ה  צְבָא֖וֹת  תַּעֲשֶׂה־  זֹּֽאת׃  ס 

Judgment against Israel's Pride

דָּבָ֛ר  שָׁלַ֥ח  אֲדֹנָ֖י  בְּיַעֲקֹ֑ב  וְנָפַ֖ל  בְּיִשְׂרָאֵֽל׃ 

וְיָדְעוּ֙  הָעָ֣ם  כֻּלּ֔וֹ  אֶפְרַ֖יִם  וְיוֹשֵׁ֣ב  שֹׁמְר֑וֹן  בְּגַאֲוָ֛ה  וּבְגֹ֥דֶל  לֵבָ֖ב  לֵאמֹֽר׃ 

10 לְבֵנִ֥ים  נָפָ֖לוּ  וְגָזִ֣ית  נִבְנֶ֑ה  שִׁקְמִ֣ים  גֻּדָּ֔עוּ  וַאֲרָזִ֖ים  נַחֲלִֽיף׃ 

11 וַיְשַׂגֵּ֧ב  יְהוָ֛ה  אֶת־  צָרֵ֥י  רְצִ֖ין  עָלָ֑יו  וְאֶת־  אֹיְבָ֖יו  יְסַכְסֵֽךְ׃ 

12 אֲרָ֣ם  מִקֶּ֗דֶם  וּפְלִשְׁתִּים֙  מֵֽאָח֔וֹר  וַיֹּאכְל֥וּ  אֶת־  יִשְׂרָאֵ֖ל  בְּכָל־  פֶּ֑ה  בְּכָל־  זֹאת֙  לֹא־  שָׁ֣ב  אַפּ֔וֹ  וְע֖וֹד  יָד֥וֹ  נְטוּיָֽה׃ 

Judgment against Israel's Hypocrisy

13 וְהָעָ֥ם  לֹא־  שָׁ֖ב  עַד־  הַמַּכֵּ֑הוּ  וְאֶת־  יְהוָ֥ה  צְבָא֖וֹת  לֹ֥א  דָרָֽשׁוּ׃  ס 

14 וַיַּכְרֵ֨ת  יְהוָ֜ה  מִיִּשְׂרָאֵ֗ל  רֹ֧אשׁ  וְזָנָ֛ב  כִּפָּ֥ה  וְאַגְמ֖וֹן  י֥וֹם  אֶחָֽד׃ 

15 זָקֵ֥ן  וּנְשׂוּא־  פָנִ֖ים  ה֣וּא  הָרֹ֑אשׁ  וְנָבִ֥יא  מֽוֹרֶה־  שֶּׁ֖קֶר  ה֥וּא  הַזָּנָֽב׃ 

16 וַיִּֽהְי֛וּ  מְאַשְּׁרֵ֥י  הָֽעָם־  הַזֶּ֖ה  מַתְעִ֑ים  וּמְאֻשָּׁרָ֖יו  מְבֻלָּעִֽים׃ 

17 עַל־  כֵּ֨ן  עַל־  בַּחוּרָ֜יו  לֹֽא־  יִשְׂמַ֣ח ׀  אֲדֹנָ֗י  וְאֶת־  יְתֹמָ֤יו  וְאֶת־  אַלְמְנֹתָיו֙  לֹ֣א  יְרַחֵ֔ם  כִּ֤י  כֻלּוֹ֙  חָנֵ֣ף  וּמֵרַ֔ע  וְכָל־  פֶּ֖ה  דֹּבֵ֣ר  נְבָלָ֑ה  בְּכָל־  זֹאת֙  לֹא־  שָׁ֣ב  אַפּ֔וֹ  וְע֖וֹד  יָד֥וֹ  נְטוּיָֽה׃ 

Judgment against Israel's Unrepentance

18 כִּֽי־  בָעֲרָ֤ה  כָאֵשׁ֙  רִשְׁעָ֔ה  שָׁמִ֥יר  וָשַׁ֖יִת  תֹּאכֵ֑ל  וַתִּצַּת֙  בְּסִֽבְכֵ֣י  הַיַּ֔עַר  וַיִּֽתְאַבְּכ֖וּ  גֵּא֥וּת  עָשָֽׁן׃ 

19 בְּעֶבְרַ֛ת  יְהוָ֥ה  צְבָא֖וֹת  נֶעְתַּ֣ם  אָ֑רֶץ  וַיְהִ֤י  הָעָם֙  כְּמַאֲכֹ֣לֶת  אֵ֔שׁ  אִ֥ישׁ  אֶל־  אָחִ֖יו  לֹ֥א  יַחְמֹֽלוּ׃ 

20 וַיִּגְזֹ֤ר  עַל־  יָמִין֙  וְרָעֵ֔ב  וַיֹּ֥אכַל  עַל־  שְׂמֹ֖אול  וְלֹ֣א  שָׂבֵ֑עוּ  אִ֥ישׁ  בְּשַׂר־  זְרֹע֖וֹ  יֹאכֵֽלוּ׃ 

21 מְנַשֶּׁ֣ה  אֶת־  אֶפְרַ֗יִם  וְאֶפְרַ֙יִם֙  אֶת־  מְנַשֶּׁ֔ה  יַחְדָּ֥ו  הֵ֖מָּה  עַל־  יְהוּדָ֑ה  בְּכָל־  זֹאת֙  לֹא־  שָׁ֣ב  אַפּ֔וֹ  וְע֖וֹד  יָד֥וֹ  נְטוּיָֽה׃  ס 

Study Bible © 2011 - 2013 by Biblos.com in cooperation with Helps Ministries. For comparative study, where possible, chapter and verse numbers on Biblos.com sites are mapped to the traditional convention used by the KJV, NASB, NIV and others. Section Headings Courtesy INT Bible © 2012, Used by Permission

Bible Hub

Isaiah 8
Top of Page
Top of Page